کوری انڈرسن نے شاہد آفریدی کا ریکارڈ توڑ دیا

نیوزی لینڈ کے بلے باز کوری انڈرسن نے 36 گیندوں پر سنچری بنا کر ایک روزہ کرکٹ کی تیز ترین سنچری کا ریکارڈ اپنے نام کر لیا ہے۔ نیوزی لینڈ اور ویسٹ انڈیز کے درمیان کھیلی جانے والی ایک روزہ میچوں کی سیریز کے تیسرے میچ کو بارش کی وجہ سے 21 اوورز فی ٹیم تک محدود کر دیا گیا تھا۔ ٹاس جیت کر ویسٹ انڈیز نے نیوزی لینڈ کو پہلے بیٹنگ کی دعوت دی تو میزبان ٹیم نے مقررہ 21 اوورز میں انتہائی جارحانہ بیٹنگ کرتے ہوئے 283 رنز بنائے۔ نیوزی لینڈ کے بلّے باز کوری انڈرسن پانچویں نمبر پر بیٹنگ کرنے آئے اور انہوں نے پاکستانی بلے باز شاید آفریدی کا تیز ترین سنچری کا ریکارڈ توڑ دیا۔ انڈرسن نے مجموعی طور پر 14 چھکوں اور 6 چوکوں کی مدد سے 47 گیندوں پر 131 رنز بنائے۔ نیوزی لینڈ کی ٹیم نے 20 اوورز کے اختتام پر تین وکٹوں کے نقصان پر 275 رنز بنا رکھے تھے جو کسی ٹی ٹوئنٹی میچ کا بھی سب سے زیادہ سکور ہوتا۔ دوسری جانب ویسٹ انڈیز کی بیٹنگ کا آغاز اچھا نہ تھا اور اب سے کچھ دیر پہلے ہی انہوں نے پہلے اوور میں ہی ایک کے سکور پر اپنی پہلی وکٹ کھو دی۔ میچ ابھی کوئینز ٹاؤن سنٹر میں جاری ہے۔