جسم سے بھاری وزن اُٹھانیوالی چیونٹی کی تصویر نے انعام جیت لیا

لندن (مانیٹرنگ ڈیسک) سائنس کے موضوع پر تصاویر کی ایک نمائش میں ایک چیونٹی کی تصویر نے انعام حاصل
کرلیا جس میں وہ اپنے وزن سے سو گنا زیادہ وزن اٹھا رہی ہے۔ تصویر میں ایک ایشیائی قسم کی چیونٹی کو دکھایا گیا
ہے جو شیشے جیسی جگہ سے الٹی لٹک رہی ہے اور اس کے منہ میں پانچ سو ملی گرام وزن ہے۔ تصویر کیمبرج
یونیورسٹی کے ماہر حیوانات ڈاکٹر تھامس اینڈ لین نے اتاری ہے جو کیڑوں کے پیروں کی چپکنے کی صلاحیت پر
تحقیق کررہے تھے۔ ڈاکٹر اینڈ لین کو اس تصویر پر سات سو پاﺅنڈ انعام ملا۔ تحقیق میں دکھایا گیا ہے کہ چیونٹیاں کس
طرح مختلف وزن اٹھانے کے لئے اپنے پیروں کے نیچے نرم حصے کی شکل اور حجم بدلتی ہیں۔ ڈاکٹر اینڈ لین نے کہا
کہ ان کی تحقیق سے سائنسدانوں کو بہتر گوند بنانے میں مدد مل سکتی ہے۔ انہوں نے کہا کہ چیونٹیوں کے پیروں کے
نیچے سے بنے پیڈ خود بخود صاف ہوجاتے ہیں اور کسی بھی قسم کی سطح سے چپک سکتے ہیں۔