حکومت، طالبان مذاکرات کی حمایت امن سے مشروط ،یورپی یونین نے خواتین ،اقلیتوں ، مزدوروں کے تحفظ اور بھارت سے تعلقات بہتر بنانے کا مطالبہ کردیا

برسلز (مانیٹرنگ ڈیسک) پاکستان کو جی ایس پی پلس کا درجہ ملنے کے بعد یورپی یونین نے ایک قرارداد منظور کی جس میں پاکستان سے 35 نکات پر عملدرآمد کا مطالبہ کیا گیا ہے۔ میڈیا رپورٹس کے مطابق قرارداد میں کہا گیا ہے کہ پاکستان دہشت گردی سے نمٹنے کیلئے سخت اقدامات کرے، خواتین اور اقلیتوں کے حقوق کا تحفظ یقینی بنانے کے ساتھ ساتھ تعلیم پر توجہ دی جائے۔ پاکستان فاٹا میں اپنی خودمختاری اور حکومتی رٹ یقینی بنائے جبکہ بھارت سے تعلقات میں بہتری لائے اور محنت کشوں کو انٹرنیشنل لیبر آرگنائزیشن کے کنونشن کے مطابق حقوق دے۔ اس قرارداد میں افغان امن عمل کو کامیاب بنانے، افغانستان سے غیر ملکی افواج کے انخلاءمیں مدد کرنے اور ایٹمی عدم پھیلاﺅ کو یقینی بنانے کا مطالبہ بھی شامل ہے۔یورپی یونین نے حکومت اور طالبان کے مذاکرات کی حمایت بھی امن سے مشورط کی ہے ۔