سعودی ڈرائیور کو کرتب دکھاکر مشہوری کرنا مہنگا پڑ گیا

ریاض (مانیٹرنگ ڈیسک) سعودی عرب کے دارالحکومت ریاض کی ایک عدالت نے ڈرائیونگ کے کرتب دکھانے
والے نوجوان کو دس سال قید اور ایک ہزار کوڑوں کی سزا سنائی ہے اور اس کے تاحیات ڈرائیونگ کرنے پر
پابندی عائد کردی ہے۔ اس 23 سالہ نوجوان نے یوٹیوب پر اپنی ڈرائیوری کے مظاہرے کی ویڈیوز پوسٹ کی
تھیں۔ ان میں وہ اپنی کار کو تیز رفتاری سے دو پہیوں پر چلارہا ہے اور بعض مرتبہ سامنے سے آنے والی
ٹریفک کی جانب تیزی سے کار کو بھگاتا ہوا لے جارہا ہے۔ ایک وڈیو میں اس نے اور اس کے دو دوستوں نے
مشین گنیں اٹھا رکھی ہیں اور وہ دن دیہاڑے ہوائی فائرنگ کررہے ہیں۔ ڈرائیونگ کے کرتب دکھاتے ہوئے اس
نے ایک نوجوان کی جان بھی لی تھی۔ عدالت نے اسے سزائے موت دینے سے اتفاق نہیں کیا۔ واضح رہے کہ
ریاض کی خفیہ پولیس نے اس کرتب باز ڈرائیور کو نومبر 2012ءمیں گرفتار کیا تھا۔ اس کے گھر سے اکیس
ٹائر، مختلف آلات، جعلی نمبر پلیٹیں اور شناختی کارڈز برآمد ہوئے تھے۔