حاملہ خواتین کے اپنے ہونیوالے بچے سے رابطے کیلئے ایپلی کیشن متعارف

نیویارک (مانیٹرنگ ڈیسک) انفارمیشن ٹیکنالوجی نے اس قدر ترقی کرلی ہے کہ اب ایک نئی سمارٹ فون ایپ کے ذریعے حاملہ خواتین اپنے ہونے والے بچے کی دل کی دھڑکن سن سکتی ہیں , اس کے ہلنے جلنے کی آواز سن سکتی ہیں اور بڑے ہونے کے عمل کو بھی مانیٹرنگ کرسکتی ہیں۔ بیلابیٹ نامی ایپ ایپل سٹور اور انڈرائڈ پر مفت دستیاب ہے۔ اس کے علاوہ بیلابیٹ کنکٹڈ سسٹم علیحدہ سے حاصل کیا جاسکتا ہے جس کے ذریعے ماں اپنی اور بچے کی دل کی دھڑکن سن سکتی ہے اور آوازیں بھی ریکارڈ کی جاسکتی ہیں۔یہ ایپلی کیشن حاملہ خواتین کا موڈجانچنے کی صلاحیت بھی رکھتی ہے جس کے ذریعے ڈپریشن کے شواہد کا بھی پتہ لگایا جاسکتا ہے۔ کمپنی کی سربراہ کا کہنا ہے کہ ان کا مقصد صحت پر ہونے والے خرچ کو کم کرنا اور حاملہ خواتین کے تجربے کو بہتر بنانا ہے۔