بَول یا پیشاب کی مدد سے بجلی تیار

برطانوی سائنسدانوں نے کہا ہے کہ انہوں نے بَول یا پیشاب کی مدد سے اس قدر بجلی تیار کرنے میں کامیابی حاصل کر لی ہے جس سے وہ ایک موبائل فون کو چارج کرنے میں کامیاب ہو گئے ہیں۔ انگلینڈ کی یونیورسٹی آف برسٹل اور برسٹل روبوٹکس لیبارٹری کے محققین کے مطابق انہوں نے ایک ایسا فیول سیل تیار کیا ہے جو بیکٹیریا کو استعمال کرتے ہوئے پیشاب کو اس طرح کیمیائی طور پر توڑتا ہے کہ اس سے بجلی پیدا ہوتی ہے۔ ان محققین کی طرف سے یہ دعویٰ رائل سوسائٹی آف کیمسٹری کے تحقیقی جریدے ’فزیکل کیمسٹری، کیمیکل فزکس‘ میں شائع ہونے والی تحقیق میں کیا گیا ہے۔ ان محققین میں شریک انجینئر لوانِس لیروپولوس کے بقول، ’’اب تک کسی نے بھی پیشاب سے بجلی پیدا کرنے میں کامیابی حاصل نہیں کی۔ اس لیے یہ نئی دریافت سنسنی خیز ہے۔ توانائی کے اس ذریعے کی خوبصورتی یہ ہے کہ اس میں ہم ہوا یا سورج کی شکل میں قدرت پر انحصار نہیں کر رہے۔ ہم دراصل ویسٹ کو دوبارہ استعمال کرکے توانائی پیدا کر رہے ہیں۔‘‘ لیروپولوس کا مزید کہنا تھا، ’’ایک چیز ایسی ہے جس کے بارے میں ہم یقین سے کہہ سکتے ہیں کہ اس کی دستیابی میں کمی نہیں ہوگی اور وہ ہمارا پیشاب ہے۔‘‘ محققین کی اس ٹیم نے کاربن فائبر کے اینوڈز پر بیکٹیریا پیدا کیے، جنہیں سیرامک سے بنے سیلنڈرز میں رکھ دیا گیا۔ جب بَول یعنی پیشاب ان سیلنڈرز سے گزرتا ہے تو یہ بیکٹیریا اس کے کیمائی اجزاء کو توڑ دیتے ہیں جس سے کم مقدار میں الیکٹریکل چارج پیدا ہوتا ہے،جسے کیپیسٹر پر اسٹور کر لیا جاتا ہے۔ لیروپولوس کو امید ہے کہ یہ سیل جس کا موجودہ سائز ایک کار کی بیٹری کے برابر ہے، کئی دیگر ضروریات کے لیے بھی تیار کیا جا سکتا ہے: ’’ہمارا ہدف یہ ہے کہ کوئی اس طرح کی چیز تیار کی جا سکے جسے باآسانی ساتھ رکھا جا سکے۔‘‘ اپنے تیار کردہ اس فیول سیل کی کارکردگی کے بارے میں لیروپولوس کا کہنا تھا، ’’اب تک جو مائیکروبیئل فیول پاور سٹیک (MFC) ہم نے تیار کیا ہے وہ اس قدر بجلی پیدا کر رہا ہے کہ جو موبائل فون کو اس حد تک چارج کر دیتا ہے کہ اس سے ایس ایم ایس بھیجے جا سکیں، انٹرنیٹ براؤزنگ کی جا سکے اور کم دورانیے کی ٹیلیفون کال بھی کی جا سکتی ہے۔‘‘ ان کا کہنا تھا، ’’ہمارا تصور آزما لیا گیا ہے اور یہ کام کرتا ہے۔ اب یہ ہم پر ہے کہ ہم اس کے پراسیس کو کس طرح بہتر کرتے ہیں کہ ایسے MFC تیار کیے جا سکیں جو ایک بیٹری کو مکمل طور پر چارج کر سکے۔‘‘ ان برطانوی محققین کو امید ہے کہ آخر کار وہ ایسی ٹیکنالوجی تیار کرنے میں کامیاب ہو جائیں گے جس سے گھریلو اشیا کو درکار بجلی کی ضرورت پوری کی جا سکے گی۔