سعودی چوغے میں ملبوس برطانوی ولی عہد کا رقص

شہزادہ چارلز آج کل مشرقِ وسطیٰ کے دورے پر ہیں برطانوی ولی عہد شہزادہ چارلز نے سعودی عرب میں منعقدہ ثقافتی میلے کے دوران روایتی عرب لباس پہن کر اور تلوار سنبھال کر رقص کیا ہے۔ ریاض میں منعقدہ اس میلے میں شہزادہ چارلز نے سعودی شاہی خاندان کے ہمراہ ’عرضہ‘ نامی رقص میں حصہ لیا۔ اس موقع پر برطانوی ولی عہد روایتی عرب چوغے میں ملبوس تھے جسے ’ثوب‘ کہا جاتا ہے۔ شہزادہ چارلز آج کل مشرقِ وسطیٰ کے دورے پر ہیں اور اس دوران وہ سعودی عرب کے علاوہ قطر بھی جائیں گے۔یہ ایک برس کے دوران شہزادے کا ان دونوں ممالک کا دوسرا دورہ ہے ’عرضہ‘ نامی رقص میں عموماً سینکڑوں مرد اور نوجوان تلواروں کے ساتھ حصہ لیتے ہیں اور یہ سعودی شادیوں کے موقع پر بھی کیا جاتا ہے۔ شہزادہ چارلز جس رقص میں شریک ہوئے وہ ریاض میں سالانہ جنادریہ فیسٹیول میں کیا گیا۔ دو ہفتے جاری رہنے والا یہ میلہ سعودی زندگی اور ثقافت کے مختلف پہلو اجاگر کرنے کے لیے منعقد کیا جاتا ہے۔ ریاض کے سٹیڈیم میں منعقدہ تقریب میں شہزادہ چارلز کی میزبانی کے فرائض سعودی شہزادے اور ملکی انٹیلی جنس کے سابق سربراہ مقرن بن عبدالعزیز نے نبھائے۔