کلر بلائینڈ شخص کی دنیا رنگین ہوگئی ، وائے فائے آنکھ نصب

لندن (مانیٹرنگ ڈیسک) برطانوی ماہرین نے کلر بلائینڈ شخص کے سر میں ”تیسری آنکھ“ لگا کر اس کی زندگی رنگین کردی، اس ”آنکھ“ کی مدد سے اب وہ ہر رنگ کی پہچان کرسکے گا۔ 31 سالہ برطانوی باشہدہ نیل ہربسن پیدائشی طور پر بیمار ”ایکرومیٹوپسیا“ کا شکار تھا جس میں انسان صرف سیاہ اور سفید رنگ کو دیکھ سکتا ہے اور دیگر کوئی بھی رنگ اسے نظر نہیں آتا۔ گزشتہ 10 برسوں سے وہ رنگوں کی شناخت کے لئے ایک ایسی ڈیوائس کا استعمال کررہا تھا جو کیمرے کی مدد سے رنگوں کی پہچان کرکے اس شخص کو وائبریشن کے ذریعے آگاہ کرتا تھا کہ وہ کونسا رنگ دیکھ رہا ہے۔ چند ماہ قبل اس نے ڈاکٹروں کو مشورہ دیا کہ وہ اس ڈیوائس میں جدت لائیں اور اس کے سر میں نصب کردیں۔ ماہرین نے چند ماہ کی مشقت کے بعد اپنی نوعیت کے انوکھے آپریشن سے یہ ڈیوائس اس کے سر کے پچھلے حصے میں نصب کردی ہے جس کے ایک کونے پر کیمرا ہے جبکہ دوسرے کونے پر جو اس کی کھوپڑی کے اندر ہے میں ایک چپ موجود ہے جو کیمرے سے رنگ دیکھنے کے بعد وائبریشن کے ذریعے اسے بتاتی ہے کہ وہ کونسا رنگ دیکھ رہا ہے۔ ماہرین کے مطابق ہر رنگ کی مختلف وائبریشن ہے۔ اس ڈیوائس کی تنصیب کے بعد نیل ہربسن دنیا کا پہلا ”آئی بورگ“ بنادیا ہے۔ برطانوی ماہرین کے مطابق اس ڈیوائس میں وائی فائی انٹرنیٹ کی سہولت بھی موجود ہے جس کی مدد سے رنگ کی تصویر اور تفصیل سمارٹ فون پر بھی حاصل کی جاسکتی ہے۔