مودی جیت گئے تو رویہ چین‘ پاکستان کے ساتھ سخت ہو گا: قریبی ساتھیوں کا انکشاف

برلن (این این آئی) بھارتیہ جنتا پارٹی کے وزارت عظمیٰ کے لیے نامزد امیدوار نریندر مودی کے دو قریبی ساتھیوں نے انکشاف کیا ہے کہ اگر مودی الیکشن جیت گئے تو سرحدی تنازعات میں ہمسایہ ملک چین اور روایتی حریف پاکستان کے ساتھ سخت رویہ اپنایا جائے گا، جرمن ریڈیوسے بات چیت کرتے ہوئے بھارتیہ جنتا پارٹی کے منشور کی تیاری میں شامل دو مشیروں کا کہنا تھا کہ مودی اپنی خارجہ پالیسی کو مزید مضبوط کریں گے لیکن علاقائی تنازعات کو معیشت پر حاوی نہیں ہونے دیا جائے گا، مودی ایٹمی دھماکوں کے بڑے حامی رہے ہیں اور طاقت اور امن کی پالیسی کی طرف جھکاؤ رکھتے ہیں، بھارتیہ جنتا پارٹی جلد از جلد ملکی بحریہ کو مضبوط کرنا چاہتی ہے اس کے علاوہ اس پارٹی کے منشور میں سرحدی علاقوں میں نئی سڑکوں کی تعمیر اور مواصلاتی رابطوں میں اضافہ کرنا بھی شامل ہے۔ بھارتیہ جنتا پارٹی پاکستان کے خلاف مزید طاقتور پالیسیاں اپنائے گی، اس کی ایک وجہ تو قومی دباؤ ہو گا اور دوسری وجہ تبدیل ہوتی ہوئی علاقائی صورتحال ہو گی۔